Markavélin Magnús Sverrir Þorsteinsson mun spila áfram með Reyni Sandgerði í sumar en hann var gríðarlega mikilvægur partur af liðinu í fyrra.
Magnús Sverrir er goðsögn hjá Keflavík þar sem hann lék yfir 300 keppnisleiki á 17 árum hjá félaginu áður en hann lagði skóna á hilluna 2016.
Magnús, sem verður 39 ára í september, reif skóna af hillunni í fyrra og skoraði þá 15 mörk í 14 deildarleikjum er Reynir komst upp úr 3. deildinni.
Það eru því mikil gleðitíðindi fyrir Reynismenn að þessi kempa ætli að spila áfram með félaginu í sumar, en Magnús var leikmaður ársins hjá Reyni í fyrra.
„Ég get varla beðið eftir að mótið byrji og bíð spenntur eftir að klæðast Reynistreyjunni að nýju, enda Reynir með skemmtilegt lið í sumar," sagði Magnús Sverrir, en fyrirtæki hans Blue Car Rental er styrktaraðili Reynis.
Það verður áhugavert að fylgjast með Magga í 2. deild en hann hefur aldrei spilað í henni áður.
Athugasemdir