Olympique de Marseille er búið að staðfesta brottför Steve Mandanda frá félaginu eftir fjórtán ára dvöl. Markvörðurinn er 37 ára gamall og missti byrjunarliðssæti sitt hjá Marseille á síðustu leiktíð.
Hann átti tvö ár eftir af samningnum við félagið en fær að yfirgefa á frjálsri sölu eftir að hafa misst byrjunarliðssætið. Rennes er búið að staðfesta komu markvarðarins til sín.
Mandanda er hokinn reynslu. Hann er langleikjahæsti leikmaður í sögu Marseille með 610 leiki fyrir félagið. Næstleikjahæstur er Mathieu Valbuena með 327 leiki að baki.
Auk þess á Mandanda 34 landsleiki að baki fyrir Frakkland þar sem hann var varamarkvörður fyrir Hugo Lloris stærsta hluta landsliðsferilsins.
Til gamans má geta að Mandanda fór til Crystal Palace tímabilið 2016-17 en átti erfitt uppdráttar. Meiðsli settu strik í reikninginn og þóttu frammistöður hans ekki nógu góðar svo hann var seldur aftur til Marseille ári síðar fyrir 3 milljónir evra.