Ítalía: Inter ekki í vandræðum með nýliða Parma

Ítalíumeistarar Inter unnu öruggan 3-1 sigur á nýliðum Parma í 15. umferð Seríu A á Giuseppe Meazza-leikvanginum í Mílanó í kvöld.

Armenski leikmaðurinn Henrikh Mkhitaryan átti flottan leik með Inter og tókst að leggja upp tvö.

Hann átti stoðsendingua á Federico DiMarco á 40. mínútu áður en hann lagði upp annað markið fyrir Nicolo Barella snemma í síðari hálfleik.

Franski sóknarmaðurinn Marcus Thuram kláraði síðan dæmið með skoti af stuttu færi eftir hornspyrnu. Hornspyrnan kom á nær á Yan Bisseck sem framlengdi boltann á fjær á Thuram sem var aleinn á auðum sjó og eftirleikurinn auðveldur.

Allt stefndi í fullkomna frammistöðu en níu mínútum fyrir lok venjulegs leiktíma setti Matteo Darmian boltann í eigið net. Dennis Man kom sér inn í teiginn og ætlaði Darmian að koma í veg fyrir að hann næði að koma boltanum á markið, en í staðinn potaði hann boltanum framhjá Yann Sommer og í eigið mark.

Leiðinlegur endir á annars góðum leik hjá Inter sem er í 3. sæti með 31 stig en Parma í 12. sæti með 15 stig.