Spánn: Frábær endurkoma Betis gegn Alaves

Framherjinn Borja Iglesias reyndist bjargvættur Real Betis í kvöld sem spilaði við Alaves í spænsku deildinni.

Flestir bjuggust við heimasigri Betis í kvöld en liðið hefur verið á góðu róli og er í Evrópubaráttu.

Alaves er þó einnig í harðri fallbaráttu og komst yfir 2-0 í fyrri hálfleik með mörkum Joselu og Edgar Mendez.

Borja Iglesias tókst að laga stöðuna fyrir Betis úr vítaspyrnu í seinni hálfleik og útlitið orðið töluvert betra.

Það var svo hinn 39 ára gamli Joaquin sem jafnaði metin á 81. mínútu en hann hafði komið inná sem varamaður.

Borja var svo aftur á ferðinni á 88. mínútu og skoraði þar sitt annað mark og þriðja mark Betis til að tryggja dýrmætan 3-2 sigur.