Alexander Aron Davorsson, þjálfari kvennaliðs Aftureldingar, var hæstánægður eftir frábæran 4-0 sigur í úrslitaleik við FH um sæti í efstu deild kvenna á næsta ári.
Staðan var markalaus þar til á 69. mínútu þegar flóðgáttirnar opnuðust og Afturelding setti fjögur mörk á fimmtán mínútum.
„Stuðningurinn sem við fengum hérna í Mosó í dag, þetta var ógleymanleg stund fyrir stelpurnar að hafa upplifað svona fótboltaleik," sagði Alexander Aron eftir sigurinn og segir að reynslan eftir stórleikinn gegn KR hafi hjálpað að stilla spennustig leikmanna.
„Það sem hjálpaði okkur mikið var að við áttum KR í þriðja síðasta leik og það mættu 500 manns. Þannig stelpurnar voru orðnar aðeins vanar þessari pressu og þessum látum. Svo hittum við Jóhann Inga sálfræðing í gær og hann hjálpaði hópnum mikið."
Alexander telur góða liðsheild og jákvæðni vera leyndarmálið á bak við góðan árangur Aftureldingar í sumar og verður spennandi að fylgjast með liðinu í efstu deild á næsta ári.
Athugasemdir
