Úrslitaleikurinn í Bose-mótinu fór fram í kvöld er Breiðablik unnu Víking Reykjavík með sannfærandi 5-1 sigri. Markaskorarar Blika voru Kiddi Steindórs, Gísli Eyjólfsson, Höggi Gunnlaugs, Anton Logi og Benedikt Waren en mark Víkinga skoraði Adam Pálsson úr vítapsyrnu.
"Við erum aldrei sáttir með að tapa leik, þetta er tilfinning sem við þekkjum voðalega lítið eða það er mjög langt síðan við töpuðum leik. Töpuðum fyrir góðu liði Blika, fyrri hálfleikurinn var gríðarlega skemmtilegur og þetta var hörkuleikur. Takturinn datt aðeins úr þessu þegar skiptingarnar byrja, menn eru misjafnlega langt komnir í undirbúningi, menn búnir að vera lengi í fríi, sumir byrja fyrr en sumir seinna. En ég er ánægður með vinnuframlagið, gott að fá svona leik í kvöld og leggja inn í fitness bankann."
Það var mikill hiti í leiknum og Arnar sjálfur æstur á hliðarlínunni.
"Það er bara komin ákveðin hefð í víkina að vinna leiki og vinna titla og þannig á það bara að vera, þannig vinnast mót og menn eiga að vera hungraðir. Það voru margir ungir sem fengu tækifærið og vita núna betur hvað þarf að gera til að vera í fremstu röð. Þetta eru tvö bestu liðin á Íslandi í dag það er ekkert flóknara en það þannig menn þurfa aðeins að átta sig á hvar menn standa gagnvart þessum bestu."
Víkingar hafa nú þegar samið við fjóra nýja leikmenn, búast þeir við fleiri leikmönnum fyrir Lengjubikarinn sem hefst í febrúar?
" Kyle (McLagan) kemur til okkar í janúar sem er miðvörður svo fer það bara eftir því hvort við seljum leikmenn eða ekki. Hópurinn okkar er sterkur að mínu mati en mér finnst við vanta einn öflugan miðvörð svo við erum með samkeppni í þeirri stöðu. Við vorum með þrjá sterka í fyrra en með Halla og Kyle erum við bara með tvo og höfum verið að prófa Kalla og Atli í miðverði. Þannig þú getur sagt við séum með fjóra en við þurfum örugglega þrjá hreinræktaða miðverði því það verða svo mikið af leikjum næsta sumar. Þetta er fljótt að gerast ef menn lenda í veseni og þá getur liðið lent í veseni líka."
Viðtalið má sjá í heild sinni hér fyrir ofan en þar talar Arnar um ungu leikmennina sína, stöðu Valgeirs Valgeirssonar, mót erlendis í janúar sem og margt fleira.
Athugasemdir
