„Þetta var bara geggjað," sagði Andri Lucas Guðjohnsen leikmaður íslenska landsliðsins og fyrsti markaskorari kvöldsins eftir að Ísland vann Skotland 3-1.
Lestu um leikinn: Skotland 1 - 3 Ísland
„Við spiluðum vel og við villdum gera betur frá síðasta verkefni. Þannig að við vorum bara mjög ánægðir með þennan leik."
Ísland átti slæman glugga síðast þar sem þeir töpuðu tvívegis gegn Kosovo. Leikurinn í kvöld var töluvert betri.
„Við vorum bara betur staðsettir á vellinum og erum farnir að þekkja kerfið aðeins betur, og það sem Arnar vill fá frá okkur. Svo þorðum við líka bara að spila. Við komum okkur kannski í vesen tvisvar, eða þrisvar en það er bara partur af þessu. Við erum að reyna að bæta okkur sem lið og erum byrjaðir að spila fótbolta. Þann fótbolta sem Arnar vill spila. Þannig eins og ég segi þá komum við okkur kannski tvisvar, þrisvar í vesen en sigur í dag, og bara nokkuð ánægður með þennan leik."
Andri skoraði frábært mark á 8. mínútu leiksins en hann var beðinn um að líkja því við önnur mörk sem hann hefur skorað á ferlinum.
„Það hlýtur að vera nokkuð ofarlega. Þetta var geggjað mark, ég var bara búinn að ákveða að ég myndi taka snertingu og þruma í boltann. Þótt að ég hafi fengið hann á vinstri. Bara geggjað að sjá hann fljúga upp í þaknetið."
Eftir erfiðleikana í síðasta glugga hefur það verið gott fyrir sálina að ná í úrslit og spila vel.
„Jú, fyrir okkur sem leikmenn og þjálfarana líka. Við erum farnir að sjá bætingar og erum að þróa okkar leik. Þannig það er bara mjög jákvætt."
Skotland á nokkra stjörnu leikmenn sem spila meðal annars fyrir Liverpool og Napoli, en þeim gekk ekki vel í kvöld.
„Þeir mega vera eins pirraðir og þeir vilja. Þetta er bara fótboltaleikur, bara hver ætlar sér að vinna leikinn. Við ætluðum að gera það. Það þýðir ekkert annað en að vera bara leiðinlegur til baka og það er bara það sem við gerðum, og leyfðum þeim ekkert að komast inn í hausinn á okkur. Það var kannski líka bara jákvætt, að við héldum haus og vorum þéttir varnarlega, og bara spiluðum mjög vel sem lið."
Ísland spilar næst gegn Norður-Írlandi í Belfast.
„Við nýtum okkur daginn á morgun til að hvíla okkur, til að ná okkur. Þetta var mjög erfiður leikur, mikið um hlaup, en við viljum bara gera nákvæmlega það sama gegn Norður-Írum í Belfast."
Viðtalið má sjá í heild sinni í spilaranum hér fyrir ofan.
