„Ósáttur við að tapa og þetta var ekki sanngjarnt tap“ sagði Jóhann Kristinn Gunnarsson, þjálfari Þór/KA eftir 2-0 tap gegn Þrótti í Laugardalnum í dag.
Lestu um leikinn: Þróttur R. 2 - 0 Þór/KA
„Miðað við leikinn þá náttúrulega áttum við að vinna hann en við bara fáum á okkur tvö kúkamörk sem að við eigum náttúrulega ekkert að gera. Klaufalegt hjá okkur og það sem að við erum náttúrulega svekktust með í dag er að hafa ekki skorað. Á þokkalegum degi hefðum við gert fimm, sex mörk, miðað við færin sem að við búum til. En eins og ég segi, það er svona, það er eitthvað yfir Laugardalnum í sumar og stigin fara þangað og öll mörkin, það er bara þannig“ hélt hann svo áfram.
Það var búinn að vera stígandi í spilamennsku liðsins fram að landsleikjahléinu sem var að klárast og Jóhann var væntanlega að vonast eftir því að halda þeirri þróun áfram í dag.
„Ég veit það ekki. Ef einhver er að fylgjast með þessum leik þá held ég að þessi leikur hafi að mörgu leyti borið ágætt vitni fyrir okkur í Þór/KA og hérna, en því miður þá er bara er eiginlega enginn að spá í þetta, fáir fylgjast með og hvað þá að velta þessu fyrir sér að einhverju viti.“
Sandra María Jessen, besti leikmaður Þór/KA síðustu ár fékk úr litlu að moða í leiknum og aðspurður hvort að eitthvað í varnarleik Þróttar hefði komið þeim á óvart sagði hann:
„Nei, nei þetta er bara eins og ég segi, ég ætla nú ekkert að vera að tala um dómgæslu eða neitt en það er tekið fast á Söndru og hún náttúrulega þolir það auðvitað en það eru aðeins takmörk samt fyrir þessu hvað er hægt að ganga langt í þessu. Sandra var bara eins og aðrir hjá okkur bara pínu klaufi að skora ekki, kom sér í góð færi og átti náttúrulega að skora. Það er tekið hart á henni og mönnum finnst eins og það sé mannalegt að leyfa því að viðgangast því að þarna fer landsliðsmaður og þá leyfum við leikmönnum að taka aðeins harðar á því “
Viðtalið má sjá í heild sinni í spilaranum.
