Birta Georgsdóttir, sóknarmaður Breiðabliks, var valinn maður leiksins þegar Íslandsmeistarar Breiðabliks tóku á móti nýliðum FHL í Bestu-deildinni í dag.
Lestu um leikinn: Breiðablik 6 - 0 FHL
Birta skoraði 1 og lagði upp 2 mörk í leiknum. Hvernig líður henni eftir svona frammistöðu?
„Frábær tilfinning, gott að svara eftir svona leik. Við töluðum um að við ætluðum að mæta hérna og gera þetta almennilega og mér fannst við gera það.“
Nik lét sínar konur heyra það og þegar fréttaritari Fótbolti.net bar það undir Birtu fór hún að hlæja og hafði þetta um málið að segja:
„Við fengum vægan hárblásara, það er staðan. Við töluðum um að hreinsa aðeins til sendingar, návígi og seinni bolta sem voru ekki að detta okkar megin. Mér fannst við koma út í seinni hálfleikinn og svara því mjög vel.“
Breiðabliksliðið er búið að skora 35 mörk í 8 leikjum, langflest allra liða í deildinni. Er ekki gaman að vera framherji í þessu Breiðabliksliði?
„Jú klárlega, það er ekki hægt annað en að vera glaður þegar maður fær svona hjálp eins og er í kringum mann, þetta eru bara eintóm gæði. Tala nú ekki um Dreu (Innsk. fréttaritara: Andrea Rut), Öglu Maríu og Sammy, þetta eru allt toppleikmenn þannig þetta er bara geðveikt.“
Viðtalið í heild sinni má sjá í spilaranum hér að ofan.
