Fram fór til Eyja og gerði 2-2 jafntefli við ÍBV í 21. umferð Bestu deildar karla í dag.
„Hefðum viljað vinna, að sjálfsögðu, en tiltölulega jafn leikur og erfitt að segja að jafntefli hafi ekki verið sanngjörn úrslit. En við komumst yfir tvisvar í leiknum og maður vill klára þrjú stigin en því miður þá bara enn eitt jafnteflið og við erum búnir að gera svolítið mikið af þeim," sagði Jón Sveinsson, þjálfari Fram strax að leik loknum.
Fram tók tvisvar sinnum forystu í leiknum en náði ekki að klára stigin þrjú og gerði þar með sitt þriðja jafntefli í röð.
„Mér fannst ÍBV svona megin partinn af leiknum voru bara tiltölulega grimmari en við á seinni boltann og vinna þá og settu okkur oft undir pressu og í vandræði. Aðstæður náttúrulega ekkert frábærar en þannig var það fyrir bæði lið en mér fannst það svona þannig að þeir voru yfir í baráttunni og í svona aðstæðum þá var það nóg til þess að við vorum að ströggla aðeins."
Lestu um leikinn: ÍBV 2 - 2 Fram
Fram tekur á móti Keflavík í lokaleik deildarinnar, áður en tvískipt úrslitakeppni hefst. Fram er enn í möguleika á að vera í efri hlutanum en þurfa líka að treysta á að Stjarnan misstígi sig.
„Keflavík er bara með hörkulið og við þurfum að vera tilbúnir í þann leik eins og alla aðra. Ég meina það var hörkuleikur hérna í dag, ÍBV búnir að vera á mjög góðu róli þannig ég held að við þurfum bara að virða þetta stig og svo er Keflavík heima og við viljum vinna leiki heima, þannig það verður hörkuleikur. Þeir eru væntanlega í svipaðri stöðu þá, þannig að eina sem þú getur gert er að vinna leiki og sérð svo til bara hvert það tekur okkur."
„Jú, jú auðvitað stefnum við á það (að vera í efri hlutanum) eins og staðan er núna, en það er ekki í okkar höndum. Við þurfum að vinna og treysta á að Stjarnan tapi. Það verður erfitt en eina sem við getum gert er bara að fara í leikinn um næstu helgi og ætla að vinna hann, þrjú dýrmæt stig hvar sem við endum svo í töflunni og erum að spila í október," sagði Jón að lokum.
