Pétur Theodór riftir við Breiðablik (Staðfest)

Fótbolti.net ræddi við framherjann stæðilega í dag og sagði hann frá því að hann og Breiðablik hefðu komist að samkomulagi um riftun á samningi en hann var samningsbundinn út komandi tímabil.

„Skrokkurinn er þokkalegur, hnéð er gott en formið mætti vera betra," sagði Pétur við Fótbolta.net.

„Ég má í raun gera allt á æfingum, var byrjaður í sendingaræfingum og aðeins að fikra mig áfram. Ég ákvað í síðustu viku að stíga aðeins frá þessu þannig ég og Breiðablik ákváðum að rifta. Þetta var alltaf að fara vera langsótt hjá mér í Breiðabliki í sumar þannig mér fannst best bara að stíga aðeins frá þessu og sjá til hvað ég vil gera í sumar. Hvort sem það verði að halda áfram einhvers staðar eða bara segja þetta gott."

Er eitthvað plan sem þú vilt elta næstu vikur?

„Eins og staðan er í dag er ég bara að reyna koma mér í betra stand sjálfur og svo ætla ég bara að sjá til. Ég er frekar rólegur," sagði Pétur.

Pétur er 28 ára framherji sem hefur skorað 104 mörk í 197 KSÍ leikjum á sínum ferli. Hann var markakóngur Lengjudeildarinnar 2021 með 23 mörk og var í kjölfarið fenginn í Breiðablik. Hann missti af öllu tímabilinu 2022 vegna hnémeiðsla. Hann er uppalinn í Gróttu en á einnig leiki fyrir Kríu.