Ætlar að ræða við Chelsea um framtíð Lukaku - „Augljóslega komið upp vandamál"

Lukaku hefur skorað þrjú mörk í síðustu tveimur deildarleikjum en það eru hans fyrstu mörk í úrvalsdeildinni frá því í desember. Það vakti athygli og fór misvel í menn þegar Lukaku fór í viðtal hjá Sky Italia í desember þar sem hann m.a. gagnrýndi leikkerfi Chelsea.

Frá þeim tímapunkti hefur Lukaku verið í mjög takmörkuðu hlutverki í liði Chelsea og ætlar umboðsmaður hans, Federico Pastorello, að ræða við Chelsea um framtíð Lukaku á næstunni.

„Eftir að Chelsea greiddi þessa upphæð þá gat enginn séð þetta fyrir," sagði Pastorello í La Repubblica. Hann viðurkennir að upp hafi komið vandamál á tímabilinu.

„Það er augljóst að það hafi komið upp vandamál á tímabilinu. En tölurnar, það verður að meta hversu þungt þær vega: hann er besti markaskorari liðsins á tímabilinu, þrátt fyrir að hafa ekki fengið að spila jafnmikið og sumir liðsfélagar hans. Það þarf að meta stöðuna. Framundan er barátta um Meistaradeildarsæti og úrslitaleikur í bikarnum. Öll einbeiting hans er á þeim verkefnum og við höfum ekki rætt neitt annað."