Arna Sif Ásgrímsdóttir leikmaður Vals í Bestu deild kvenna kom í viðtal eftir 2-0 sigur Vals á Stjörnunni í kvöld.
Arna sagði að spilamennsku hefði getað verið betri en var ánægð með að landa sigri.
"Þetta var pínu hark bara, það sást að þau vildu ekki gera mikil mistök og ætluðu ekki að opna sig mikið. Þetta var mikið svona miðju moð en sem betur fer nýttum við föstu leikatriðin okkar í dag þannig að við erum bara sáttar með það.".
Lestu um leikinn: Stjarnan 0 - 2 Valur
Það var lítið um færi í leiknum og fyrir utan föst leikatriði sköpuðu liðin sér fá færi.
"Nei, í rauninni erum við ekki að búa okkur til nein færi, við erum að koma okkur í góðar stöður til þess að koma okkur í færi en svo einhvernveginn klikkum við alltaf á síðasta þriðjungi, síðustu sendingunni, eitthvað svoleiðis þannig að það var ekki mikið um færi í þessum leik.".
Mist Edvardsdóttir og Arna Sif mynda gríðarsterkt hafsentapar Vals en fyrir utan það að vera öflugir varnarmenn eru þær báðar gríðarlega góðir skalla menn og er erfitt að verjast þeim í hornspyrnum. Arna Sif og Mist skoruðu mörk Vals í leiknum. En hvað ætli þær geti skorað mörg mörk saman í sumar?
"Ég var einhversstaðar búin að heyra að við ættum að skora tíu saman, ég held að það sé bara gott markmið.
Viðtalið við Örnu Sif má sjá í heild sinni í spilaranum hér að ofan.
