Fótbolti.net hafði samband við Sigurð Hlíðar Rúnarsson, deildarstjóra knattspyrnudeildar Breiðabliks, í dag. Hann var spurður hvort einhver þróun væri á málum þeirra Hlyns og Gísla.

„Bologna þarf að staðfesta fyrir lok júní hvort þeir ætli að nýta forkaupsréttinn eða ekki. Við höfum ekki heyrt annað en að þeir hafi gert vel, staðið sig og það kæmi okkur ekki á óvart ef þeir myndu nýta forkaupsréttinn," sagði Sigurður.

Andri Fannar Baldursson er leikmaður Bologna og það er Ari Sigurpálsson einnig. Andri var spurður út í Íslendingana á blaðamannafundi í Ungverjalandi í mars.

Ertu í miklum samskiptum við Íslendingana?

„Já, ég er í samskiptum við þá. Við reynum að hittast eitthvað inn á milli þegar það má. Það er takmarkað sem má hittast utan æfinga og við æfum ekkert alltaf á sama tíma, það er fínt að hafa aðra Íslendinga upp á félagslega partinn að gera,“ sagði Andri.