Erik ten Hag, stjóri Manchester United, ætlaði að gefa leikmönnum liðsins frí frá æfingu í dag en Man Utd mætti Brentford í gær.
United var niðurlægt en liðið tapaði með fjórum mörkum gegn engu þar sem heimamenn í Brentford skoruðu fjögur mörk á fyrstu 35. mínútum leiksins.
Enskir miðlar greina frá því að Ten Hag hafi ákveðið að láta leikmenn mæta á æfingasvæðið í dag eftir þessa hörmungar frammistöðu og fara yfir málin.
Það eru átta dagar í næsta leik Man Utd en þá fær liðið Liverpool í heimsókn á Old Trafford eða þann 22. ágúst.
United er með 0 stig eftir tvo fyrstu leikina í deildinni og er markatalan í mínus 5. Ten Hag sagði í viðtali eftir leikinn í gær að frammistaðan hafi verið skammarleg og að félagið sé að vinna í því að sækja nýja leikmenn.