Jón Þór Hauksson, landsliðsþjálfari A kvenna, hefur valið hópinn sem tekur þátt í Algarve Cup 2019. Ísland mætir Kanada 27. febrúar og Skotlandi 4. mars. Leikið er um sæti 6. mars.

Margrét Lára Viðarsdóttir, markahæsta landsliðskona sögunnar, snýr aftur í hópinn. Margrét spilaði síðast landsleik í apríl 2017 en hún hefur síðan þá slitið krossband og farið í barneignaleyfi. Hinn 33 ára gamla Margrét hefur raðað inn mörkum með Val í vetur og er nú mætt í hópinn á nýjan leik.

Dagný Brynjarsdóttir snýr einnig aftur eftir barneignaleyfi en hún spilaði ekkert í fyrra. Dagný spilaði síðast landsleik í október 2017.

Sandra María Jessen, sóknarmaður Bayer Leverkusen, er í hópnum en hún var ekki valin í hópinn í sigrinum á Skotum í vináttuleik í síðasta mánuði. Þórdís Hrönn Sigfúsdóttir leikmaður Kristianstad er líka í hópnum en hún á engan A-landsleik að baki.

Athygli vekur að Fanndís Friðriksdóttir er ekki í hópnum en Jón Þór Hauksson, landsliðsþjálfari, mun tjá sig um ástæður þess á fréttamannafundi innan tíðar.

Elísa Viðarsdóttir og Anna Rakel Pétursdóttir detta úr hópnum frá því síðast sem og miðjumaðurinn ungi Alexandra Jóhannsdóttir en hún er í verkefni með U19 ára landsliðinu.