Stjarnan tók á móti FH á Samsungvellinum í Bestu deild karla í kvöld. Um var að ræða hörkuleik en bæði lið hafa verið á góðri siglingu upp á síðkastið. Niðurstaðan var markalaust jafntefli og er óhætt að segja að það hafi verið sanngjörn niðurstaða.
„Þetta var baráttuleikur, erfiður leikur. Við skoruðum færri mörk en við ætluðum okkur og fengum færri stig. Það er stundum þannig, við erum búnir að vinna marga leiki í röð og nú var það stoppað. Við þurfum að meta það hvað við gerðum vel í þessum leik og hvað við gerðum illa. Við þurfum aðeins að skoða hvað veldur og hvað við hefðum geta gert betur."
Lestu um leikinn: Stjarnan 0 - 0 FH
Jökull Elísabetarson var fjarri góðu gamni á hliðarlínunni í kvöld en hann tók út leikbann. Það kom því í hlut Þórarins Inga Valdimarssonar að stýra liðinu í kvöld. Aðspurður hvort það breytti einhverju að hafa ekki aðalþjálfarann á hliðarlínunni sagði Þórarinn:
„Það er góð spurning. Kannski hefðum við unnið, hefði hann verið með. Kannski hefðum við tapað, hefði hann verið með. Það er erfitt að segja en auðvitað viljum við hafa alla sem við getum með okkur. Við vorum með tvo leikmenn í banni og einn þjálfara. Auðvitað er alltaf betra að allir séu tiltækir en hvort það hafi verið afgerandi fyrir leikinn veit ég ekki. Klárlega vil ég frekar hafa hann á hliðarlínunni, heldur en upp í stúku. Hann gerir töluvert meira gagn þar, þó að það fari kannski betur um hann í stúkunni."
Þetta var fyrsti leikur efri hluta Bestu deildar karla eftir tvískiptingu og var því vel mætt og mikil spenna í loftinu. Það eru ansi margir sem hafa skoðun á tvískiptingunni en Guðmundi kann nokkuð vel við fyrirkomulagið.
„Það hljóta allir að hafa skoðun á þessu fyrirkomulagi. Ég sjálfur myndi vilja að spila þéttar, hafa styttra bil á milli leikja og halda meiri spennu. Ég væri til í það og held að það myndi auka spennu í mótinu."
Viðtalið má finna í spilaranum að ofan.
