Roma marði 1-0 sigur á Lazio í borgarslag í Róm í Seríu A á Ítalíu í dag. Lorenzo Pellegrini skoraði markið í sínum fyrsta leik á tímabilinu og aðeins nokkrum vikum eftir að Roma reyndi að losa sig við hann.

Lazio skapaði sér meira af færum í fyrri hálfleik. Pedro Rodriguez skaut boltanum rétt yfir markið snemma leiks og þá varði Mile Svilar frá Mattia Zaccagni eftir tæpan hálftímaleik.

Pellegrini, sem var að spila sínar fyrstu mínútur á tímabilinu, skoraði sigurmark leiksins á 38. mínútu.

Ítalinn var á sölulista hjá Roma í sumar og honum tjáð að samningurinn yrði ekki framlengdur. Fyrirliðabandið var einnig tekið af honum, en sá ætlar að kveðja með stæl.

Mark hans var það fjórða gegn Lazio á ferlinum og mikilvægt var það.

Lazio fékk algert dauðafæri til að jafna leikinn snemma í síðari hálfleiknum er Boulaye Dia hljóp á arfaslaka sendingu Gianluca Mancini. Senegalinn komst einn á móti Svilar í markinu, en setti allt of mikinn kraft í skotið sem fór yfir markið.

Fimm mínútum fyrir lok venjulegs leiktíma sá Rade Belahyane, leikmaður Lazio, rautt fyrir ljóta tæklingu á Manu Kone og léku því Lazio-menn manni færri síðustu mínúturnar en virtust samt mun sterkari.

Zaccagni kom sér í dauðafæri sem Svilar varði frábærlega og þá átti Danilo Cataldi hörkuskot í þverslá. Svakaleg pressa frá Lazio, en færin fóru forgörðum í dag og er það Roma sem heldur í montréttinn í Rómarborg.

Matteo Guendouzi, miðjumaður Lazio, fékk að líta rauða spjaldið eftir leik fyrir kjaftbrúk og vandræði liðsins því enn meiri fyrir næsta deildarleik gegn Genoa.

Lazio er í 14. sæti með aðeins 3 stig úr fjórum leikjum en Roma í 4. sæti með 9 stig.