Arnar Gunnlaugsson.
Úr leiknum í kvöld.
Víkingur tapaði á grátlegan hátt 2-1 gegn Shamrock Rovers í forkeppni Meistaradeildarinnar í kvöld. Nikolaj Hansen skaut framhjá úr vítaspyrnu í blálokin sem hefði tryggt framlengingu. Þar hefði Víkingur verið í kjörstöðu því Shamrock var búið að missa mann af velli með rautt spjald.
„Það er mikið af tilfinningum. Grátlegt. Það gerðist svo mikið á lokamínútunum að maður er enn að ná utan um þetta. Maður þurfti að hughreysta liðið og minna menn á að enn er mikið að keppa um í sumar," segir Arnar Gunnlaugsson þjálfari Víkings í viðtali við Sverri Örn Einarsson, fréttamann Fótbolta.net.
„Það er mikið af tilfinningum. Grátlegt. Það gerðist svo mikið á lokamínútunum að maður er enn að ná utan um þetta. Maður þurfti að hughreysta liðið og minna menn á að enn er mikið að keppa um í sumar," segir Arnar Gunnlaugsson þjálfari Víkings í viðtali við Sverri Örn Einarsson, fréttamann Fótbolta.net.
Lestu um leikinn: Shamrock Rovers 2 - 1 Víkingur R.
Með því dramatískara sem ég hef upplifað í fótbolta
Eftir markalausan fyrri leik í Víkinni var Shamrock 2-0 yfir í hálfleik í leiknum í kvöld. Sverrir spyr Arnar hvort ekki sé hægt að segja að fyrri hálfleikur hafi verið hreinlega lélegur af hálfu Víkings?
„Nei, það eru ákveðnir þættir í okkar leik sem við þurfum að laga og það er fókus og einbeiting. Þessi tvö mörk eru bara klaufaleg af okkar hálfu og gerðu það að verkum að það var á brattann að sækja. Við vorum alls ekki út úr þessu og gerðum breytingar. Menn gáfust ekki upp og við fengum strax góð færi í seinni hálfleik. Þetta var rússíbanareið allan seinni hálfleik."
„Þeir missa mann út af og svo fáum við víti í lokin. Ég hef upplifað ansi mikið í fótbolta og þetta var með því dramatískara," segir Arnar.
Voru allt öðruvísi en Víkingar bjuggust við
„Þetta var svo áhugaverð viðureign að spila við þetta írska lið. Þeir voru allt öðruvísi en við vorum búnir undir. Þeir voru allt öðruvísi en á móti Blikunum og allt öðruvísi en þeir hafa verið í írsku deildinni. Þeir voru að spila fótbolta eins og ég var kannski vanur í gamla daga, sendingar innfyrir á fljótan framherja og þess háttar. Við díluðum ekki nægilega vel við það og á endanum varð það okkur að falli. Í þessum keppnum snýst þetta um að komast áfram með hvaða ráðum sem er, eins og í bikarkeppninni. Ég held að fáir muni eftir einhverri tölfræði úr þessum leik. Bara að við duttum út, við klikkuðum bara og viðurkennum það og reynum að bæta okkur í næstu viðureign."
Svo kemur sólin upp og lífið heldur áfram
Dómari leiksins flautaði af um leið og Hansen klúðraði vítaspyrnunni í blálokin. Hvernig var upplifunin af þessu augnabliki?
„Maður trúði þessu ekki, þetta var of mikill rússíbani og erfitt að útskýra þetta nema maður er á staðnum. Maður reynir að halda haus og bera sig mannlega. En þegar maður er 51 árs og búinn að vera í fótbolta þetta lengi þá veistu að þú mátt vera svekktur í kvöld og í flugvélinni á leið heim en svo kemur sólin upp og lífið heldur áfram. Það er rosalegt um þessa útileiki okkar í Evrópu, þetta hefur verið svakaleg dramatík."
Viðtalið má heyra í heild í spilaranum hér að ofan en þar tjáir Arnar sig meðal annars um það verkefni að fá menn upp á tærnar fyrir næstu verkefni.
Athugasemdir
