Tindastóll hefur náð samningum við Jacqueline Altschuld og Murielle Tiernan um að þær spili áfram með liðinu í Inkasso-deildinni næsta sumar en þetta staðfesti Guðni Þór Einarsson, þjálfari Tindastóls, í samtali við mbl.is í dag.
Murielle hefur dregið vagninn í sóknarleik Tindastóls undanfarin tvö tímabil. Í sumar var hún markahæst í Inkasso-deildinni með 24 mörk í 17 leikjum en hún var einnig valin best í deildinni í vali fyrirliða og þjálfara hjá Fótbolta.net.
Í fyrra skoraði Murielle einnig 24 mörk þegar Tindastóll vann 2. deildina. Í ár endaði liðið í 3. sæti í Inkasso-deildinni og rétt missti af sæti í Pepsi Max-deildinni.
Samkvæmt frétt mbl.is reyndu Þór/KA, FH og fleiri félög að krækja í Murielle en hún ákvað að leika áfram með Tindastóli.
Jacqueline kom til Tindastóls fyrir síðasta tímabil og skoraði átta mörk í tólf leikjum í Inkasso-deildinni í sumar.
Mbl.is segir einnig frá því að Vigdís Edda Friðriksdóttir sé á förum frá Tindastóli. Hin tvítuga Vigdís er að ganga til liðs við Breiðablik. Vigdís skoraði fimm mörk í sautján leikjum í Inkasso-deildinni í sumar en þrátt fyrir ungan aldur á hún fimm tímabil að baki í meistaraflokki.
Sjá einnig:
Best í 2. deild: Ævintýrakona sem lætur veikindi ekki stoppa sig
Athugasemdir