Íslenska U15 kvennalandsliðið spilaði sinn fyrsta leik á gríðarlega sterku UEFA móti í dag.

Mótið fer fram í Portúgal og er Ísland í riðli með Spáni og Þýskalandi, auk heimakvenna.

Stelpurnar okkar áttu flottan leik gegn afar vel spilandi spænsku liði og gerðu 3-3 jafntefli.

Fanney Lísa Jóhannesdóttir, sem lék með meistaraflokki Álftaness í 2. deild í sumar þrátt fyrir að vera fædd 2009, kom Íslandi yfir í fyrri hálfleik en þær spænsku voru snöggar að jafna og var staðan 1-1 í leikhlé.

Spánn tók forystuna í upphafi síðari hálfleiks en Fanney Lísa skoraði jöfnunarmark skömmu síðar og hélst staðan jöfn 2-2 allt þar til á lokakaflanum. Þá tókst þeim spænsku að taka forystuna á ný, en aftur jöfnuðu íslensku stelpurnar og urðu lokatölur 3-3 eftir fjöruga viðureign. Hafrún Birna Helgadóttir skoraði jöfnunarmarkið.

Þetta var frábær frammistaða hjá íslensku stelpunum sem settu spænska liðið undir mikla pressu á löngum köflum í leiknum.

Hægt er að horfa á leikinn með að smella hér fyrir neðan, og er vert að spóla áfram til að sjá lagleg mörk Íslands. Fanney skoraði sérstaklega góð mörk á 29. og 65. mínútum leiksins.

Horfðu á leikinn