Þýskaland: 9. sætið tveimur stigum frá toppnum eftir sigur Dortmund

Thorgan Hazard virtist vera að koma heimamönnum í Dortmund yfir á 33. mínútu en mark hans var dæmt af eftir notkun á VAR.

Hazard lagði þó upp fyrsta og eina mark leiksins þegar hann fann Marco Reus sem skoraði með góðu skoti á 58. mínútu. Reus og Hazard eru báðir fyrrum leikmenn Mönchengladbach.

Roman Burki, markvörður Dortmund, bjargaði sínu liði með flottri markvörslu á 90. mínútu þegar hann varði frá Alassane Plea.

Mönchengladbach var fyrir umferðina í toppsætinu og er þar enn þrátt fyrir tapið en stöðuna í deildinni má sjá hér að neðan. Spennan á toppnum er mikil en Schalke getur hirt toppsætið með sigri á Hoffenheim á morgun.