Gísli baðst afsökunar á framkomu sinni - Blikar óánægðir með fréttaflutninginn

Knattspyrnudeild Breiðabliks fordæmir fréttaflutning af hegðun Gísla Eyjólfssonar á Fótbolta.net í kvöld. Í yfirlýsingu segir að Gísli hafi hlotið alvarlegt höfuðhögg og ekki verið með sjálfum sér.

Gísli veittist með fúkyrðum og merkjasendingum að Jónínu Guðbjörgu Guðbjartsdóttur ljósmyndara Fótbolta.net sem var við störf á leik Blika gegn Leiknismönnum. Hér má sjá fréttina um málið.

Gísli hefur haft samband við Jónínu og beðist afsökunar á framkomu sinni. Í tilkynningunni kemur fram að hún hafi tekið við afsökunarbeiðninni og samþykkt hana.

Gísli fékk heilahristing og þurfti að leita á sjúkrahús eftir að hann fór af velli í 2-0 tapi Breiðabliks í Breiðholtinu. Hér að neðan má sjá yfirlýsingu Blika í heild sinni.