Arsenal er á höttunum eftir tveimur brasilískum framherjum, Raphinha hjá Leeds og Gabriel Jesus hjá Manchester City.
Verðmiðinn á hvorum leikmanni er í kringum 50 milljónir punda og hefur Arsenal verið í viðræðum við Man City í nokkrar vikur varðandi möguleg kaup á Jesus.
Nú greinir Sky frá því að Arsenal er að undirbúa sig til að hefja viðræður við Leeds um Raphinha, sem vildi fara til Barcelona en er þreyttur á að bíða eftir tilboði sem mun kannski ekki berast í sumar.
Raphinha hefur verið meðal bestu leikmanna Leeds frá komu sinni til félagsins og hafa nokkur af stærstu félögum Evrópu sýnt honum mikla athygli.
Raphinha á tvö ár eftir af samningnum við Leeds á meðan Jesus á aðeins eitt ár eftir hjá City.
Leikmennirnir eru báðir 25 ára gamlir. Raphinha hefur skorað 17 og lagt upp 12 í 67 leikjum með Leeds á meðan Jesus er með 95 mörk og 46 stoðsendingar í 236 leikjum hjá City.
