Lestu um leikinn: KA 2 -  0 Víkingur R.

„Ég er ekki að grínast, það er svona þúsund sinnum merkilegra fyrir okkur að vinna þennan bikar heldur en Víkinga, með fullri virðingu, í fimmta skiptið. Sem er kannski bara eðlilegt. Þú sérð tilfinningarnar, ég get ekki lýst þessu."

„Það fannst mér, ég var náttúrulega hægra megin í fyrri hálfleik, en ég heyrði aldrei í Víkingunum nema á litlum kafla í seinni hálfleiknum þegar ég er ofan í þeim. Annars heyrði ég bara í þeim hérna (á bakvið mig). Sástu þetta? Og sérðu þetta? Stuðningsmenn okkar sturlaðir í dag, frá upphafi til enda. Ég held án gríns að við höfum bara viljað þetta meira."

„Mér fannst við gera þetta vel. Í fyrra, fannst mér á köflum, við vera að tapa boltanum of fljótt. Í dag fannst mér við þora. Auðvitað kom kannski 5-10 mínútna kafli í fyrri hálfleik þar sem Víkingarnir voru með okkur svolítið neðarlega. Við vissum að við þurftum að þrauka það. Þeir klúðra held ég einu dauðafæri í leiknum. Mér fannst þetta bara frábær leikur."

„KA hafði aldrei orðið bikarmeistari, sem er ólíkindum, farið milljón sinnum í úrslitaleik. Ég var að segja við Skúla, Hjörvar og fleiri stjórnarmenn... þetta er ellefta tímabilið mitt hérna og ég held ég hefði ekki trúað því að ég væri að fara vinna titilinn með KA. En við náðum því í dag."

„Guð minn góður, frændi"
Steinþór Már Auðunsson - Stubbur - í marki KA varði virkilega vel í uppbótartíma þegar hann kom út í teiginn og lokaði á Helga Guðjónsson sem var kominn í góða stöðu.

„Já, guð minn góður, frændi. Mamma mín og pabbi hans eru systkini. Ég og Grímsi vorum staðráðnir í því að við myndum hlaupa strax til hans eftir leik. Hann var mjög öruggur, greip inn í það sem hann átti að grípa inn í. Svo bara tekur hann Roland Eradze á 93. mínútu. Svo hirðir hann fyrirgjöf stuttu seinna eins og kóngurinn sem hann er," sagði Hrannar. Roland Eradze er fyrrum landsliðsmarkvörður Íslands í handbolta.

Viðtalið við Hrannar er talsvert lengra og má sjá það í heild sinni í spilaranum efst.