Spánn: Real Madrid kom sér á toppinn með sex mörkum

Karim Benzema og Marco Asensio léku á alls oddi er Real Madrid fékk Mallorca í heimsókn í spænska boltanum í kvöld.

Benzema skoraði eftir þrjár mínútur og tvöfaldaði Asensio forystuna en Lee Kang-in minnkaði muninn aðeins einni mínútu síðar.

Asensio skoraði sitt annað mark á 29. mínútu, eftir stoðsendingu frá Benzema, og var staðan 3-1 í leikhlé.

Í upphafi síðari hálfleiks var mark dæmt af Benzema en það gerði lítið til því skömmu síðar lagði hann aftur upp fyrir Asensio sem fullkomnaði þrennuna sína og staðan orðin 4-1.

Asensio fékk heiðursskiptingu fyrir Isco og skoraði Benzema sitt annað mark skömmu síðar, áður en Isco setti sjötta og síðasta mark Real í leiknum. Lokatölur 6-1 þar sem Asensio setti þrennu og Benzema skoraði tvö og lagði upp tvö.

Frábær stórsigur Real sem fleytir liðinu upp á toppinn, tveimur stigum fyrir ofan nágrannana í Atletico.

Villarreal 4 - 1 Elche
1-0 Y. Pino ('5)
1-1 J. Mojica ('19)
2-1 M. Trigueros ('39)
3-1 A. Danjuma ('60)
4-1 A. Moreno ('94)

Villarreal lagði þá Elche að velli og var staðan 2-1 eftir jafnan fyrri hálfleik.

Lærisveinar Unai Emery tóku völdin í síðari hálfleik og innsigluðu ensku úrvalsdeildarleikmennirnir fyrrverandi Arnaut Danjuma og Alberto Moreno þægilegan 4-1 sigur.

Villarreal er með sjö stig eftir sigurinn en liðið gerði jafntefli fyrstu fjóra leiki tímabilsins. Elche er með sex stig.