Staðan var markalaus eftir bragðdaufan fyrri hálfleik en gestirnir frá Madríd komust yfir í upphafi síðari hálfleiks með marki frá Mario Hermoso.

Leikurinn var áfram í járnum þar til Marcos Llorente tvöfaldaði forystu gestanna á 74. mínútu.

Heimamönnum tókst ekki að minnka muninn og gerði færanýting Atletico herslumuninn.

Atletico er með 32 stig á toppi deildarinnar en þetta var þriðja tapið í röð hjá Sociedad, sem er með 26 stig. Atletico á þrjá leiki til góða á Sociedad.

Real Sociedad 0 - 2 Atletico Madrid
0-1 Mario Hermoso ('49 )
0-2 Marcos Llorente ('74 )

Huesca og Levante gerðu þá jafntefli í jöfnum leik.

Javier Ontiveros kom Huesca yfir með marki úr vítaspyrnu en Levante var betra liðið í síðari hálfleik og gerði Gonzalo Melero jöfnunarmarkið.

Huesca 1 - 1 Levante
1-0 Javier Ontiveros ('31 , víti)
1-1 Gonzalo Melero ('53 )