Gestir vikunnar í sjónvarpsþætti Fótbolta.net. Fanndís Friðriksdóttir, Hildur Einarsdóttir og Kjartan Atli Kjartansson.
Samfélagsmiðlar hafa að mörgu leyti breytt lífi fólks undanfarin ár og fótboltinn er þar engin undantekning. Í sjónvarpsþætti Fótbolta.net í vikunni var mikil umræða um samfélagsmiðla og hverju þeir hafa breytt í fótboltanum.
„Ég held að það hafi breytt því hvernig leikmenn fagna mörkum," sagði Kjartan Atli Kjartansson í þættinum.
„Alan Shearer fagnaði alltaf bjánalega en samt töff og Paul Merson líka. Þeir voru ómeðvitaðir um sjálfa sig. Þetta var þeirra innra sjálf að brjótast út. Leikmenn í dag þora ekki að stíga út því að þeir eru hræddir við að það verði gert grín að þeim á samfélagsmiðlum."
Hildur Einarsdóttir, markaðsfræðingur, er mikill stuðningsmaður Manchester United og hún fylgist með leikmönnum liðsins á samfélagsmiðlum.
„Mér finnst þetta hafa gefið okkur betri aðgang að fótboltamönnunum. Mér finnst ég þekkja þá alla. Þeir sem ég er að elta eru eins og fjölskyldan í mínum huga," sagði Hildur í þættinum.
„Bastian Schweinsteiger er gott dæmi um hvernig ég tengdist leikmanni. Hann var tekinn út úr hóp sem var diss við þessa hetju sem hann er. Hann var áfram all in á Twitter að peppa strákana fyrir og eftir leik. Hann er greinilega mikill United maður og hann er legend hjá mér núna."
Gestir vikunnar í sjónvarpsþættinum
Fanndís Friðriksdóttir - @fanndis90
Hildur Einarsdóttir - @HildurEinarsd
Kjartan Atli Kjartansson- @Kjartansson4
Hér að ofan má sjá umræðuna í heild sinni.
Sjá einnig:
Sjónvarpið: Á Rooney að fara til Kína?
