Orri gat brosað að minnsta kosti fjórum sinnum í dag!
„Bara flottur leikur hjá okkur. Sérstaklega fyrri hálleikur, mjög þéttir og skeinuhættir fram á við. En flestum þjálfurum finnst skemmtilegast að halda hreinu, en ég vil bara fá mörk í þetta! Alveg sama hvernig ég vinn, bara að ég skori fleiri,'' sagði kampakátur þjálfari Þórs, Orri Freyr Hjaltalín, eftir 4-2 sigur á Gróttu í Lengjudeild karla.
Lestu um leikinn: Þór 4 - 2 Grótta
Það má segja að Þórsarar hafi gengið frá verkefninu í fyrri hálfleik. Þrjú mörk frá Ásgeiri Marinó Hilmarssyni, Jóhanni Helga Hannessyni og Fannari Daða Malmquist sáu til þess að Þór gekk til búningsherbergja með 3-0 forystu í hálfleik.
„Við vildum ekki mæta þeim hálft í hálft. Annaðhvort vorum við að reyna að hápressa þá alla leið uppi eða að droppa djúpt til baka og ég held að öll mörkin hafi komið eftir að við höfum unnið boltann á flottum stöðum og sótt á þá.''
Orri sagði að rosalega erfitt væri að spila gegn hávöxnu og líkamlega öflugu liði Gróttu.
„Þeir eru rosalega sterkir í föstum leikatriðum og við rosalega lágvaxnir, sérstaklega í dag. Okkar tveir stærstu menn í banni og ég var bara hrikalega ánægður með það hvernig við náðum að díla við það stærstan partinn af leiknum,'' sagði Orri.
Viðtalið má sjá í heild sinni í spilaranum hér að ofan.
Athugasemdir
