Arna Eiríksdóttir kemur inn í landsliðshópinn
Arna Eiríksdóttir, fyrirliði FH, hefur verið kölluð inn í A-landsliðið fyrir leikina gegn Frakklandi og Noregi í Þjóðadeildinni.
Amanda Andradóttir var valin í hópinn fyrir þetta verkefni en getur ekki verið með vegna meiðsla og því dregið sig úr hópnum.
Þorsteinn Halldórsson, þjálfari landsliðsins, hefur því kallað Örnu inn í hópinn.
Arna, sem er á þriðja tímabili sínu með FH, á 2 A-landsleiki að baki.
Hún lék í 2-0 sigri Íslands á Eistlandi í vináttulandsleik árið 2022 og í 1-0 sigrinum á Austurríki fyrir tveimur árum.
Ísland mætir Noregi ytra föstudaginn 30. maí og spilar síðan heimaleik gegn Frökkum þann 3. júní. Ísland er í 3. sæti riðilsins með 3 stig.
Athugasemdir
