Ólafur Hrannar Kristjánsson
Ólafur Hrannar Kristjánsson þjálfari Leiknis var skiljanlega nokkuð niðurlútur er hann mætti í viðtal við Fótbolta.net í kvöld að loknum leik Keflavíkur og Leiknis. Leiknir mátti þar þola stórtap 6-0 og sporin fyrir Ólaf því nokkuð þung.
„Keflavík er bara margfalt betra lið heldur en við í dag. Það er bara sannleikurinn og það sást á vellinum. Heildar hugmyndin hjá þeim er bara komin miklu lengra heldur en hjá okkur og þeir áttu sigurinn skilið.“
Þótt úrslitin 6-0 líti afar illa út fyrir Leikni áttu þeir þó sína kafla í leiknum. Í stöðunni 2-0 slakaði lið Keflavíkur vel á klónni og gestunum óx ásmeginn. Var Ólafur ósáttur við að liðið skyldi ekki nýta þann kafla betur?
„Ég er aðallega ósáttur við það að við þurftum að fá á okkur tvö mörk til þess að byrja að gera það sem okkur langaði að gera í leiknum. Við erum alltof lengi inn í einhverri skel í byrjun leikja og á meðan við erum að því að fá á okkur mörk í byrjun leikja þá er erfitt að vinna fótboltaleiki. Hvað þá á móti liði eins og Keflavík.“
Leiknismenn eru ekki ókunnir því að tapa stórt í Keflavík en á síðasta tímabili gerðu þeir slíkt hið sama sem leiddi af sér afsögn þáverandi þjálfara liðsins. Engan bilbug var þó að finna á Ólafi.
„Við þurfum algjöra naflaskoðun. Þetta verður bara að vera botninn og við verðum bara að spyrna okkur upp það er bara þannig.“
Sagði Ólafur en allt viðtalið má nálgast í spilaranum hér að ofan.
Athugasemdir
