Það komu nokkrir Íslendingar við sögu í leikjum dagsins þar sem Arnór Sigurðsson og Daníel Tristan Guðjohnsen komu saman inn af bekknum þegar Malmö átti heimaleik gegn AIK í efstu deild sænska boltans.
Þar er um að ræða hatrammann risaslag þar sem mikil stemning er á pöllunum og vanalega lítið um mörk. Það var engin breyting þar á í þetta sinn, þar sem leiknum lauk með markalausu jafntefli. Það er í fjórða sinn sem liðin gera markalaust jafntefli í síðustu fimm leikjum sín á milli.
Arnór og Daníel spiluðu síðustu 20 mínúturnar í lokuðum leik þar sem heimamenn í Malmö fengu betri færi en tókst ekki að skora.
AIK er í öðru sæti með 23 stig eftir 11 umferðir, fjórum stigum fyrir ofan Íslendingalið Malmö.
Dagur Dan Þórhallsson var þá í byrjunarliði Orlando City sem tapaði á heimavelli gegn Nashville í US Open Cup bikarkeppninni.
Dagur spilaði fyrstu 84 mínúturnar í 2-3 tapi í kaflaskiptum leik. Liðin mættust í 16-liða úrslitum og fer Nashville því áfram í næstu umferð.
Að lokum var Hjörtur Hermannsson í leikbanni vegna uppsafnaðra gulra spjalda þegar Volos tapaði á útivelli gegn Levadiakos í lokaumferðinni í Grikklandi. Volos endar þremur stigum fyrir ofan fallsæti.
Malmö 0 - 0 AIK
Orlando City 2 - 3 Nashville
Levadiakos 3 - 2 Volos
Athugasemdir
