Sheffield og Sunderland mætast á Wembley og mun sigurvegari einvígisins tryggja sér þátttökurétt í ensku úrvalsdeildinni á næstu leiktíð. Það eru gríðarlegar fjárhæðir í spilinu vegna sjónvarpstekna ensku úrvalsdeildarinnar.

Sheffield rúllaði yfir Bristol City í undanúrslitaleik Championship umspilsins á meðan Sunderland rétt marði Coventry eftir framlengingu.

Á sunnudaginn fer svo lokaumferð enska úrvalsdeildartímabilsins fram. Titilbaráttan er búin og nýliðarnir eru löngu fallnir aftur niður um deild svo spenna sunnudagsins verður eingöngu í kringum Evrópubaráttuna.

Þar eru fimm félög búin að tryggja sér þátttökurétt í Evrópukeppnum fyrir næstu leiktíð og eiga þau öll enn möguleika á að næla sér í eftirsótt Meistaradeildarsæti.

Þrjú síðustu Meistaradeildarsætin eru laus en taplið dagsins munu leika í Evrópudeildinni og/eða Sambandsdeildinni, þar sem er aðeins eitt laust sæti eftir í hvora keppni. Þá gætu Evrópusæti enskra félagsliða aukist enn frekar ef Chelsea endar í Sambandsdeildarsæti og vinnur svo líka Sambandsdeildina til að tryggja sér Evrópusæti. Það myndi gera áttunda sæti ensku úrvalsdeildarinnar kleift að spila í Sambandsdeildinni á næstu leiktíð.

Brighton situr í áttunda sæti sem stendur en getur misst það til Brentford sem er með betri markatölu. Brighton er þremur stigum fyrir ofan og heimsækir nýkrýnda Evrópudeildarmeistara Tottenham á sunnudaginn, á meðan Brentford heimsækir Wolverhampton.

Laugardagur
14:01 Sheffield Utd - Sunderland

Sunnudagur
15:00 Bournemouth - Leicester
15:00 Fulham - Man City
15:00 Ipswich Town - West Ham
15:00 Liverpool - Crystal Palace
15:00 Man Utd - Aston Villa
15:00 Newcastle - Everton
15:00 Nott. Forest - Chelsea
15:00 Southampton - Arsenal
15:00 Tottenham - Brighton
15:00 Wolves - Brentford