Halldór Árnason, þjálfari Breiðabliks.
Blikar mæta Drita frá Kosóvó á morgun.
Fyrri leikurinn fer fram á Kópavogsvelli.
„Þetta er alltaf skemmtilegur partur af sumrinu, þessir Evrópuleikir," sagði Halldór Árnason, þjálfari Breiðabliks, í samtali við Fótbolta.net í dag.
Á morgun spilar Breiðablik fyrri leik sinn gegn Drita frá Kosóvó í annarri umferð forkeppni Sambandsdeildarinnar. Fyrri leikurinn er á Kópavogsvelli.
Á morgun spilar Breiðablik fyrri leik sinn gegn Drita frá Kosóvó í annarri umferð forkeppni Sambandsdeildarinnar. Fyrri leikurinn er á Kópavogsvelli.
„Alexander Helgi er tæpur fyrir þessa leiki en aðrir eru klárir."
Hann segir erfitt að rýna í þetta Drita lið frá Kosóvó. „Þeir hafa auðvitað ekkert spilað á þessu tímabili en við erum með leikina frá því í fyrra. Þeir hafa spilað öðruvísi í deildinni en í Evrópu. Vissulega hafa þeir mætt sterkum andstæðingum í Evrópu síðustu ár. Lið frá Kosóvó hafa náð mjög góðum árangri í Evrópu og eru hátt skrifuð. Það er ástæðan fyrir því að þeir koma inn í annarri umferð," sagði Halldór.
„Það hefði verið ágætt ef þeir hefðu spilað í fyrstu umferð því þá hefðum við átt meira um þá. Við þurfum að vera undirbúnir fyrir það að þeir komi hingað og pressi mjög hátt eins og í deildinni heima. Við erum klárir í hvað sem er."
Þú skapar þína eigin heppni
Ertu ánægður með þann drátt að fá þetta lið?
„Þetta er svo flókið maður. Upprunalega eru þetta rosalega mörg lið sem þú getur mætt. Við erum í efri styrkleikaflokki og hefðum getað fengið miklu lægra skrifaðan andstæðing. En þetta er lið sem við eigum mjög góðan möguleika á því að slá út og við ætlum okkur að gera það."
„Þessi lið frá Kosóvó eru hátt skrifuð því þau hafa náð góðum árangri og kunna að vera í Evrópu. Við þurfum að taka þá alvarlega en við ætlum að slá þá út."
Ef Breiðablik slær út Drita mun liðið mæta sigurvegaranum í einvígi Cliftonville frá Norður-Írlandi og Auda frá Lettlandi. Möguleikarnir á því að komast í umspil um sæti í riðlakeppni eru frekar góðir en Blikar voru 'seeded' í drættinum eftir að hafa náð góðum árangri í Evrópukeppni í fyrra.
„Það er mikilvægt að vera með hausinn á einum leik í einu, gamla klisjan. Það sem hjálpar okkur er árangur síðustu ára, að við erum þá í efri styrkleikaflokki í þremur umferðum. Það gefur okkur aukna möguleika á að ná langt."
„Auðvitað er alltaf heppni og óheppni í þessu, en þú skapar þína eigin heppni. Víkingar skapa sína heppni með því að vera meistarar í fyrra og þá fá þeir aðra andstæðinga en hin liðin í Sambandsdeildinni. Við erum í efri styrkleikaflokki og fáum lægra skrifuð lið í okkar potta en Valur og Stjarnan sem eru 'unseeded'. Innan einhverra ramma er þetta spurning um heppni og óheppni en það er líka mjög mikilvægt að safna stigum, bæði fyrir félagið og fyrir landið. Ísland getur komið sér upp um sæti og fengið betri sæti í þessum Evrópukeppnum," sagði Halldór en allt viðtalið má sjá í spilaranum hér að ofan þar sem ræðir meðal annars meira um Drita.
Athugasemdir
