Nýliðinn og varamaðurinn Marius Bülter var hetja Köln sem vann dramatískan 1-0 sigur á Mainz í 1. umferð þýsku deildarinnar á Mewa Arena í Mainz í dag.

Fyrstu umferð fylgir oft mikil spenna og sást það í leiknum í dag en liðunum tókst ekki að skapa sér mikið í fyrri hálfleiknum og í besta falli hálf færi.

Stærsta atvikið var þegar Benedict Hollerbach fór meiddur af velli eftir fimmtán mínútur hjá Mainz, en hann var keyptur frá Union Berlín í sumar eftir frábært síðasta tímabil.

Allt í járnum í hálfleik en það færðist aðeins meira líf í leikinn þegar hálftími var eftir er Paul Nebel, sem var aftasti varnarmaður, togaði Jakub Kaminski niður sem var að sleppa í gegn. Nebel sá réttilega rauða spjaldið fyrir.

Köln reyndi að fjölga sóknarmönnum síðustu tuttugu mínúturnar en þrátt fyrir það var það Mainz sem tókst að skapa sér hættulegri færi. Seint í leiknum kom Silvan Widmer sér í góða stöðu sem náði tvisvar skoti, en í bæði skiptin komust varnarmenn Kölnar sér fyrir skotin.

Eftir frábæran varnarleik heimamanna kom höggið í byrjun uppbótartíma. Luca Waldschmidt kom með fyrirgjöfina frá hægri inn á varamanninn og nýliðann Marius Bülter sem stangaði honum í netið.

Ísak Bergmann Jóhannesson lék 80 mínútur hjá Köln, sem var hans fyrsti deildarleikur með liðinu. Hann fær 6,5 í einkunn hjá FotMob.

Lokatölur í Mainz, 0-1, Köln í vil sem fer vel af stað í endurkomu sinni í A-deildina.