Breiðablik 2 - 1 Valur
1-0 Agla María Albertsdóttir ('3)
2-0 Arna Sif Ásgrímsdóttir ('44, sjálfsmark)
2-1 Ásdís Karen Halldórsdóttir ('53)
Lestu um leikinn: Breiðablik 2 - 1 Valur
Breiðablik tók á móti Val í stórleik í toppbaráttu Bestu deildarinnar og tóku heimakonur forystuna strax á þriðju mínútu þegar Agla María Albertsdóttir skoraði laglegt mark eftir að hafa leikið á Örnu Sif Ásgrímsdóttur.
Valskonur reyndu að svara fyrir sig en marktilraunirnar voru ekki nægilega góðar og lentu þær svo í miklum vandræðum með hápressuna frá Blikum. Það sköpuðust þó ekki hættuleg færi fyrr en Breiðablik tvöfaldaði forystuna eftir vandræðagang í vítateig Vals. Arna Sif fær skráð á sig sjálfsmark eftir að hafa fengið skot í sig frá Birtu Georgsdóttur sem virtist á leið framhjá.
Ásdís Karen Halldórsdóttir minnkaði muninn með glæsilegu marki snemma í síðari hálfleik. Hún fékk boltann úti á vinstri kanti og færði sig inn á völlinn áður en hún klíndi honum undir samskeytin með óverjandi skoti.
Blikar komust nálægt því að tvöfalda forystuna á ný en Fanneyju Ingu Birkisdóttur tókst að blaka boltanum í slána. Gestirnir úr Hlíðunum voru mikið með boltann á lokakafla leiksins en tókst ekki að finna glufur á gríðarlega öflugri vörn Breiðabliks.
Lokatölur því 2-1 fyrir Blikum sem tókst að leggja ríkjandi Íslandsmeistara af hólmi.
Valur og Breiðablik eru jöfn á toppi Bestu deildarinnar með 20 stig eftir 10 umferðir.
Ásdís Karen með alvöru slútt og minnkar muninn.. 2-1 GAME ON! #bestadeildin #bestasætið pic.twitter.com/LMnNRSvBNS
— Stöð 2 Sport (@St2Sport) June 25, 2023
