Lestu um leikinn: Ísland 2 -  1 Serbía

„Við nýttum fleiri færi og skoruðum. Við sköpuðum okkur líka alveg önnur færi sem við hefðum getað skorað úr en heilt yfir fannst mér við sterkara liðið í þessum leik og áttum alveg sigurinn skilið," sagði Þorsteinn aðspurður um hvað hefði fyrst og fremst búið að baki þessum sigri.

Leikurinn byrjaði þó ekki glæsilega fyrir lið Íslands sem var lent 1-0 undir eftir aðeins um sex mínútna leik. Gestirnir frá Serbíu gerðu eftir það sitt ítrasta til þess að hægja á leiknum og nýttu hvert tækifæri sem gafst til að liggja í grasinu. Var það eitthvað sem kom Steina á óvart?

„Nei alls ekki, þær komast yfir fljótt og þá breytist aðeins planið hjá þeim. Þær fóru aftar og fóru að liggja í grasinu sem kom í sjálfu sér ekkert á óvart og er ekkert óeðlilegt þegar þú ert komin yfir og þarft bara að vinna. Þú gerir bara allt sem þú getur til að vinna fótboltaleiki og þær gerðu það.“

Ísland var 1-0 undir þegar gengið var til hálfleiks og var langt liðið á síðari hálfleikinn þegar Sveindís Jane Jónsdóttir jafnaði leikinn með snotru marki. Var púlsinn hjá Steina farinn að hækka á þeim tímapunkti?

„Já, auðvitað er maður alltaf eitthvað stressaður og það bara fylgir þessu. Það er það sem heldur manni í þessu, þetta adrenalín og kikk í þessu. Það er ástæðan fyrir því að maður er í þjálfun þessi spenna og allt sem fylgir því að spila spennandi leiki. Þetta er það sem allir vilja vera í og er allt í lagi á meðan að maður fær ekki slag.“

Sagði Þorsteinn en allt viðtalið má sjá hér að ofan en þar ræðir hann meðal annars komandi undankeppni og þróun liðsins sem og aðstöðumál landsliðins.