Sölvi og Viktor Már Jónasson tóku við þjálfun meistaraflokks Skallagríms á miðju síðasta tímabili. Þótt þeim tækist ekki að forða liðinu frá falli niður í 4. deild þá stóðu þeir sig afar vel, að mati stjórnar knattspyrnudeildar, og því var leitað eftir starfskröftum þeirra áfram. Niðurstaðan varð sú að Sölvi verður aðalþjálfari meistaraflokks, sem fyrr segir.

Sölvi hefur leikið stórt hlutverk í liði Skallagríms þrátt fyrir að hafa þurft að glíma við erfið meiðsli. Hann hefur leikið 108 meistaraflokksleiki fyrir Skallagrím en að auki 31 fyrir BÍ/Bolungarvík og 18 fyrir ÍA.

Það er markmið nýs þjálfara, sem og stjórnar Knattspyrnudeildar Skallagríms, að byggja á öflugum kjarna af heimamönnum og nú þegar eru nokkrir, sem hafa ekki mikið verið í boltanum síðustu misseri, komnir á fulla ferð á nýjan leik. Síðustu sumur hefur Skallagrímur átt gott samstarf við ÍA og vonumst við til að svo verði áfram en þaðan höfum við fengið góðan liðstyrki.

„Stjórn knattspyrnudeildar Skallagríms fagnar ráðningu Sölva og hlakkar til samstarfs við hann á komandi keppnistímabili en æfingar meistaraflokks, undir hans stjórn hefjast 1. des," segir í tilkynningu Skallagríms.