Magnús Már Einarsson, þjálfari Aftureldingar, var ánægður með frammistöðu sinna manna, þrátt fyrir 2-1 tap gegn Víkingi á útivelli í kvöld.
„Ég er svekktur að tapa. Mér fannst við eiga stig skilið, jafnvel öll þrjú. Frammistaðan var frábær og mikið hrós á strákana. Þeir ná einhverju smá áhlaupi, þar sem þeir skora þetta sigurmark en mér fannst við eiginlega vera betri. Við erum að skapa fleiri færi. Ég er gríðarlega ánægður með strákana."
Lestu um leikinn: Víkingur R. 2 - 1 Afturelding
Oliver Sigurjónsson, lykilmaður í liði Aftureldingar, fór meiddur af velli í leiknum í kvöld. Inn á kom Enes Þór Enesson Cogic og stóð hann sína plikt. Magnús Már virtist ekki hafa miklar áhyggjur af meiðslum hans.
„Þetta er bara smávægilegt högg og ég hugsa að hann verði með á móti Breiðabliki á fimmtudaginn. Enes kom inn fyrir hann og stóð sig frábærlega í leiknum. Uppalinn strákur hjá okkur."
Næsti leikur Aftureldingar er gegn Breiðabliki en bróðir Magnúsar, stendur einmitt vaktina í marki þeirra og heitir Anton Ari Einarsson.
„Það er bara gaman að mæta honum og gaman að fá Breiðablik í heimsókn. Ég held að það sé upphitun í Hlégarði og mikið húllumhæ fyrir fjölskylduna. Við þurfum enn þá meiri stuðning frá stúkunni en í dag. Ég vil sjá 10-20% af bæjarbúum mæta," sagði Magnús Már að lokum.
Viðtalið í heild sinni má nálgast í spilaranum að ofan.
