Ágúst Leó og Króatinn úr KR fara í Keflavík (Staðfest)

Ágúst Leó Björnsson, 21 árs sóknarmaður, kemur á láni frá ÍBV.

Ágúst Leó gekk í raðir ÍBV í nóvember síðastliðnum, hann kom frá Stjörnunni. Hann var á láni hjá Aftureldingu í fyrra og skoraði þar 13 mörk í 20 leikjum í 2. deildinni.

Í sumar hefur Ágúst komið við sögu í átta leikjum í Pepsi-deildinni og er hann kominn með eitt mark.

Hann klárar tímabilið í Keflavík sem er búið að lána Jeppe Hansen og er að reyna að losa sig við Lasse Risse samkvæmt öruggum heimildum Fótbolta.net.

Sjá einnig:
Jónas Guðni: Hagræðing fyrir félagið að lána Jeppe

Króatinn úr KR einnig kominn á láni
KR samdi við króatíska vinstri bakvörðinn Ivan Aleksic í síðustu viku og gerði hann samning til 2019. Ivan hefur æft með KR síðustu vikur en Rúnar Kristinsson sagði frá því í samtali við Fótbolta.net að stefnt væri að því að lána leikmanninn út þessa leiktíð.

„Hann hefur æft með okkur undanfarnar þrjár vikur og hefur staðið sig vel. Hann er góður í fótbolta en hann er ekki í leikformi. Við vonumst til að við getum notað hann í framtíðinni,\" sagði Rúnar en Ivan er 25 ára og hefur allan sinn feril leikið í Króatíu.

Keflavík tekur hann út tímabilið og fróðlegt verður að fylgjast með honum þar.

Keflavík mætir Breiðablik á morgun og eru Ágúst Leó og Ivan Aleksic báðir löglegir með Keflvíkingum í þann leik.