Hollendingar ákváðu, líkt og Belgar og Frakkar, að binda enda á knattspyrnutímabilið sitt vegna Covid-19.
Í kjölfarið tóku Hollendingar að rannsaka mögulega smithættu kórónuveirunnar í fótboltaleik. Íþróttatæknifyrirtækið Inmotio greindi 482 leiki úr efstu deild hollenska boltans til að meta nánd leikmanna á vellinum og þar af leiðandi smithættu.
Niðurstöðurnar eru sláandi: það gerist aðeins í 0,2 prósent leikja að tveir leikmenn séu nálægt hvorum öðrum í meira en 30 sekúndur í senn.
„Það mikilvægasta er að flýta fyrir hornspyrnum og setja skýrar reglur um fagnaðarlæti. Þessir tveir þættir munu gera gæfumuninn," segir meðal annars á vefsíðu Inmotio.
„Að breyta reglum um fögn og hornspyrnur getur minnkað hættu á smiti um allt að 70%," segir Vincent van Renesse, framkvæmdastjóri Inmotio.
„Annars eru leikmenn í mestri smithættu þegar leikurinn er stöðvaður, hvort sem það er fyrir VAR eða vegna meiðsla."
Hollenska knattspyrnusambandið lagði Inmotio lið í þessu verkefni. Edwin Goedhart, læknir knattspyrnusambandsins, staðfesti niðurstöður rannsóknarinnar.
„Sem betur fer er ótrúlega lítil smithætta í fótboltaleik. Þetta eru frábærar fréttir fyrir knattspyrnuheiminn. Knattspyrna er örugg íþrótt."
Athugasemdir
