Brynjar Gauti í búningi ÍBV í dag.
,,Það er gaman að taka skrefið upp á við og kominn tími á það," sagði Brynjar Gauti Guðjónsson fyrirliði Víkings frá Ólafsvík sem í dag gekk í raðir ÍBV og samdi við Vestmannaeyjaliðið til þriggja ára.
,,Mér leist best á ÍBV, það er flottur þjálfari og þetta er flott félag sem gerði góða hluti í sumar og ætlar sér stærri hluti. Það er gaman að vera partur af því."
,,Það voru einhver önnur félög sem höfðu samband, það er alltaf einhver áhugi. Ég taldi ÍBV vera besta kostinn af þessum og stend við það."
Brynjar Gauti er miðvörður og fyrir hjá ÍBV eru tveir miðverðir sem stóðu sig virkilega vel í sumar. Þeir Eiður Aron Sigurbjörnsson og Rasmus Christiansen svo Brynjar Gauti er ekki að ráðast á garðinn þar sem hann er lægstur.
,,Neinei, enda þýðir það ekki alltaf. Ég er búinn að tala við Heimi og hef fulla trú á að ég geti unnið mér sæti í liðinu og stefni á það náttúrulega."
Brynjar Gauti er aðeins 18 ára gamall en hefur þrátt fyrir það spilað yfir 60 meistaraflokksleiki með Víkingi Ólafsvík auk þess að spila með yngri landsliðum Íslands. En er erfitt að yfirgefa heimahagana?
,,Þetta var mjög erfið ákvörðun. Ég er búinn að vera lengi hjá Víking og þeir eru búnir að gera mikið fyrir mig. Það er alltaf erfitt að fara frá sínu uppeldisfélagi."
Nánar er rætt við Brynjar Gauta í sjónvarpinu að ofan.
