Matthías Guðmundsson skoraði jöfnunarmark Vals á 52.mínútu gegn Grindavík og jafnframt síðasta mark leiksins. Lokatölur á Vodafone-vellinum í kvöld, 1-1. Matthías var að vonum hundsvekktur með að fá einungis eitt stig úr leiknum í kvöld en þetta eru klárlega tvö töpuð stig í toppbaráttunni fyrir Val.
,,Við ætluðum okkur að vinna þennan leik svo það er augljóst að við erum ekki ánægðir með þetta," sagði Matthías Guðmundsson sem var sammála undirrituðu að á köflum hafi Valur yfirspilað Grindvíkingana en það dugði ekki til, til að innbyrða sigur úr leiknum,
,,Fyrri hálfleikurinn var kannski of hægur, mér fannst við vera með tök á leiknum. Ég var ekki nægilega sáttur með markið sem við fáum á okkur en í seinni hálfleik voru nokkrar góðar sóknir og mér fannst eiginlega bara eitt lið á vellinum þá," sagði Matthías.
,,Kristján lét okkur heyra það í hálfleik og það er það sem þarf eftir svona fyrri hálfleik," sagði Matthías í viðtali við Fótbolti.net eftir leikinn.
Viðtalið í heild sinni er hægt að sjá í sjónvarpinu hér að ofan.
