„Þegar ég heyrði að Lars væri inni í myndinni varð ég spenntur. Ég þekkti hann frá því að ég tók Pro Licence þjálfaragráðu í þjálfun á Englandi en þá sat hann með okkur í eina viku," sagði Heimir í Áramótum.

„Ég hef sagt, bæði í gamni og alvöru, að mér fannst ég alveg nógu góður og tilbúinn að taka við landsliðinu á þessum tíma þegar Geir hringdi í mig en eftir að hafa verið í tvö ár með Lars þá var ég alveg sannfærður um að ég var það ekki. Ég hefði gert mistök sem Lars hafði reynslu til að gera ekki og hef lært heilmikið af kallinum.“

Skilur að KSÍ vilji ekki breyta hlutunum
KSÍ tilkynnti árið 2014 að Lagerback myndi stíga til hliðar eftir EM 2016 og að Heimir tæki alfarið við. Hins vegar hefur myndast mikill þrýstingur á að halda samstarfi þeirra tveggja áfram í næstu undankeppni þar sem Ísland freistar þess að komast á sitt fyrsta heimsmeistaramót. Heimir segist ekki vita hver staðan sé í þeim málum.

„Lars hefur sagt að hann vilji ekki loka neinum dyrum. Hann er of reyndur til þess að vera að gefa út einhverjar stórar yfirlýsingar. Mér finnst eðlilegt að KSÍ vilji ekki breyta hlutunum fyrst þeir ganga svona vel,“ segir Heimir. Hann vill ekki fullyrða að hann sé tilbúinn að vera áfram með landsliðið ef Lagerback verður um kyrrt.

„Það er aftur á móti allt annað mál. Ég mun bara ræða það við mína yfirmenn þegar þar að kemur. Ég hugsa að ég læri ekkert meira á að vera tvö ár í viðbót með Lars en ég ítreka að ég skil mjög vel að KSÍ vilji ekki breyta neinu,“ segir Heimir.

Viðtalið við Heimi má lesa í heild sinni í Áramótum, tímariti Viðskiptablaðsins, en þar er farið yfir víðan völl og m.a. rætt um rætur Heimis í Vestmannaeyjum og upphaf þjálfaraferilsins.