Tilkynnt var í gær að Baldur yrði ekki áfram hjá Stjörnunni en hann átti ár eftir af samningi sínum við félagið.

„Á fundi eftir keppnistímabilið í sumar varð ljóst að hugmyndir þjálfara Stjörnunnar og Baldurs um mögulegt hlutverk innan liðsins á komandi tímabili færu ekki saman og varð niðurstaðan sú að nú skilji leiðir að minnsta kosti tímabundið," sagði í yfirlýsingu frá Stjörnunni í gær.

Baldur er 34 ára gamall miðjumaður en hann hefur leikið með Stjörnunni undanfarin fjögur ár. Í sumar spilaði Baldur átján leiki í Pepsi Max-deildinni, þar af fjórtán í byrjunarliði.

Baldur kom til Stjörnunnar frá SönderjyskE í Danmörku fyrir sumarið 2016. Á árunum 2009 til 2015 lék Baldur með KR en þar áður var hann hjá Bryne í Noregi. Þá hefur Baldur einnig leikið með Keflavík og Völsungi á ferli sínum.