Fótbolti.net

fim 01. janúar 2026 23:34

Ívan Guðjón Baldursson

Andrews vildi sjá Romero fjúka útaf

Mynd: EPA

Keith Andrews þjálfari Brentford svaraði spurningum eftir markalaust jafntefli á heimavelli gegn Tottenham Hotspur í ensku úrvalsdeildinni í kvöld.

Leikurinn var tíðindalítill og bragðdaufur en Andrews var ósáttur með eina stóra dómaraákvörðun þar sem hann vildi sjá Cristian Romero fyrirliða Tottenham fjúka af velli með rautt spjald.

01.01.2026 23:14

Myndband: Brentford vildi rautt spjald og Tottenham vítaspyrnu

Romero átti klaufalega tæklingu sem aftasti varnarmaður þar sem hann tók Igor Thiago, framherja Brentford, niður en náði líka boltanum. Andy Madley dómari dæmdi ekki, þess í stað fór Tottenham í sókn og vildi Archie Gray fá dæmda vítaspyrnu eftir að hafa fallið til jarðar innan vítateigs tæpri mínútu síðar.

Gray var að spóla sig í gegnum vörn Brentford og var með þrjá menn í sér þegar Kevin Schade fór utan í hann með þeim afleiðingum að Gray féll til jarðar, en aftur sleppti Madley því að flauta.

„Ég fór eftir leik til að spyrja dómarann út í þessa tæklingu hans (Cristian) Romero. Ég veit hversu erfitt það er að vera dómari og mér finnst mikilvægt að geta fengið útskýringar frá dómurum. Það eru heilbrigð samskipti," sagði Andrews.

„Dómarinn sagði að dómarateymið hafi ekki metið þetta sem ólöglega tæklingu og VAR-herbegið taldi þetta ekki vera augljós mistök svo þeir ákváðu að skerast ekki inn í. Ég er augljóslega ósammála þeirri niðurstöðu. Þetta er í annað sinn í tveimur leikjum sem Romero sleppur við að fá rautt spjald fyrir tæklingu á Igor Thiago. Það er ótrúlegt að hann hafi ekki fengið rautt spjald í fyrri leiknum.

„Það er ákveðin kaldhæðni fólgin í því að VAR-teymið eyddi tíma í að skoða hvort ætti að dæma vítaspyrnu án þess að skoða atvikið með Romero betur þar sem hann átti að fá rautt spjald en ekkert var dæmt. Ég hefði verið mjög ósáttur ef þeir hefðu fengið vítaspyrnu beint eftir að hafa sloppið við rautt spjald.

„Við erum ekki lið sem dýfir sér, við erum mjög heiðarlegt fótboltalið. Í þessu tilviki var augljóslega brotið á Thiago."

Thomas Frank, sem gerði magnaða hluti við stjórnvölinn hjá Brentford, snéri aftur á sinn gamla heimavöll í fyrsta sinn eftir félagaskipti sín síðasta sumar. Andrews þekkir vel til Frank eftir að hafa verið partur af þjálfarateyminu hans hjá Brentford á síðustu leiktíð.

„Það er alltaf gaman að mæta Thomas (Frank), þetta er einstaklingur sem ég ber mikla virðingu fyrir. Ég naut þess að starfa með honum á síðustu leiktíð.

„Í kvöld fannst mér við vera betra liðið og ef einhver átti skilið að sigra þennan leik, þá vorum það við."

Tottenham og Brentford áttust við í byrjun desember og þá höfðu lærlingar Thomas Frank betur á Tottenham Hotspur Stadium.

„Við spiluðum mun betur í dag heldur en fyrir 26 dögum. Við spiluðum hratt og þeir reyndu að hægja á spilinu. Markvörðurinn þeirra fékk gult spjald fyrir tímasóun og það segir allt sem segja þarf um hvernig þetta spilaðist."

		L	U	J	T	ms:	mf:	mun	Stig
1	Arsenal	19	14	3	2	37	12	+25	45
2	Man City	19	13	2	4	43	17	+26	41
3	Aston Villa	19	12	3	4	30	23	+7	39
4	Liverpool	19	10	3	6	30	26	+4	33
5	Chelsea	19	8	6	5	32	21	+11	30
6	Man Utd	19	8	6	5	33	29	+4	30
7	Sunderland	19	7	8	4	20	18	+2	29
8	Everton	19	8	4	7	20	20	0	28
9	Brentford	19	8	3	8	28	26	+2	27
10	Crystal Palace	19	7	6	6	22	21	+1	27
11	Fulham	19	8	3	8	26	27	-1	27
12	Tottenham	19	7	5	7	27	23	+4	26
13	Newcastle	19	7	5	7	26	24	+2	26
14	Brighton	19	6	7	6	28	27	+1	25
15	Bournemouth	19	5	8	6	29	35	-6	23
16	Leeds	19	5	6	8	25	32	-7	21
17	Nott. Forest	19	5	3	11	18	30	-12	18
18	West Ham	19	3	5	11	21	38	-17	14
19	Burnley	19	3	3	13	20	37	-17	12
20	Wolves	19	0	3	16	11	40	-29	3