Caligiuri: Kominn tími til að berjast með kjafti og klóm

Schalke tapaði á heimavelli gegn fallbaráttuliði Werder Bremen og er aðeins búið að næla sér í fjögur stig úr síðustu ellefu leikjum. Það eru 29 'töpuð' stig.

Tvítugi varnarmaðurinn Jean-Clair Todibo, sem er hjá Schalke að láni frá Barcelona, gerðist sekur um mistök gegn Bremen. Hann missti boltann á slæmum stað sem varð til þess að Leonardo Bittencourt skoraði það sem reyndist eina mark leiksins.

„Ég ætla ekki að kenna Jean-Clair um tapið. Jú hann tapaði knettinum og það leiddi til marks en í síðustu viku var það einhver annar. Vikuna á undan var það einhver annar. Við megum ekki leyfa svona hlutum að gerast, þetta er vandamál liðsheildarinnar," sagði Caligiuri.

„Núna er kominn tími til að berjast með kjafti og klóm."

Schalke var í Meistaradeildarbaráttu þar til fyrir ellefu umferðum þegar allt byrjaði að fara til helvítis. Schalke er fimm stigum frá Evrópudeildarsæti sem stendur og nítján stigum frá Meistaradeildinni.