Barca mistókst að stela Altimira í sumar

Altimira er uppalinn hjá Barcelona og voru Börsungar með sérstakt endurkaupsákvæði eftir að hafa hleypt honum til Sabadell í spænsku C-deildinni á frjálsri sölu.

Altimira var lykilmaður í liði Sabadell og samdi um að fara til Getafe á frjálsri sölu þegar samningur hans við Sabadell rann út núna í sumar.

Altimira var með tveggja milljón evra riftunarákvæði í samningi sínum við Getafe, sem Real Betis ákvað að nýta sér í ágúst. Altimira var því leikmaður Getafe í svo lítið sem einn mánuð á undirbúningstímabilinu áður en hann skipti til Betis.

Mateu Alemany var yfirmaður fótboltamála hjá Barca í sumar og vildi hann fá Altimira aftur til félagsins, en sú tilraun bar ekki árangur. Leikmaðurinn var staðráðinn í að fara til Betis þar sem hann ætti meiri möguleika á að fá spiltíma heldur en hjá Barca.

Altimira er 22 ára gamall og spilar sem varnartengiliður. Honum hefur verið líkt við Sergio Busquets, fyrrum miðjumann Barcelona og spænska landsliðsins.