Kaka, Neymar og hinn brasilíski Ronaldo eru meðal þeirra sem fá gagnrýni.

„Pele er á sama stalli í heiminum og Nelson Mandela og Mahatma Gandhi en Brasilíumenn kunna ekki að meta það. Þeir sem hafa unnið heimsmeistaratitilinn en komu ekki til að kveðja Pele hafa sýnt vanvirðingu," segir José Ferreira Neto, fyrrum leikmaður Brasilíu og einn helsti sjónvarpsmaður landsins í dag.

Margir leikmenn sem spiluðu með Pele mættu við útförina en enginn af þeim leikmönnum sem urðu síðast heimsmeistarar með Brasilíu, á mótinu 2002, mætti. Aðeins einn af þeim sem unnu HM 1994 mætti, Mauro Silva sem er nú varaforseti fótboltasambands Sao Paulo.

Kaka sagði í desember að Brasilíumenn væru ekki að sýna þjóðhetjum sínum nægilega mikla virðingu og var þá að tala um gagnrýnina sem Neymar og Ronaldo hafa fengið. Kaka mætti ekki til Santos.

„Hvar var Kaka, sá sem sagði að Brasilíumenn væru ekki að sýna hetjunum sínum nægilega mikla virðingu. Kaka, það er klárt að þú ert sá sem þarft að sýna stærstu hetjunum virðingu," skrifaði íþróttablaðamaðurinn Walter Casagrande Júnior.

Casagrande segir að Kaka og aðrar brasilískar stórstjörnur séu vanar því að fá borgað fyrir að mæta á viðburði.