Frenkie De Jong, miðjumaður Barcelona á Spáni, verður ekki til sölu í sumar en þetta segir spænski miðillinn Sport.
Barcelona var reiðubúið að selja De Jong síðasta sumar þar sem félagið hefur verið að ganga í gegnum fjárhagserfiðleika.
De Jong er launahæsti leikmaður félagsins og vildi því félagið skera niður launakostnaðinn.
Manchester United var í baráttunni um hann en De Jong neitaði að fara og fór það svo að hann var áfram hjá félaginu.
Á þessu tímabili hefur hann blómstrað undir stjórn Xavi og staðan önnur en Barcelona ætlar ekki að selja hann í sumar samkvæmt Sport.
„Við erum að sjá bestu útgáfuna af Frenkie síðan ég og þjálfaraliðið komum til Barcelona. Hann er frábær í bæði vörn og sókn, er með svakalegt sjálfstraust og við erum ánægðir með hann,“ sagði Xavi í síðasta mánuði.
Athugasemdir